परदेशातील समलिंगी जोडप्याला हिंदुस्थानातील मूल दत्तक घेता येणार नाही, असे मुंबई उच्च न्यायालयाने नेमलेल्या समितीने आपल्या अहवालात स्पष्ट केले आहे. मात्र परदेंशात स्थायिक झालेल्या अविवाहित, विधवा-विधुर तसेच घटस्फोटित व्यक्तींना मूल दत्तक घेण्यास कायद्याने परवानगी देण्यात आली आहे. परदेशात स्थायिक झालेल्या निपुत्रिकांना मूल दत्तक द्यावे किंवा नाही यासंबंधी विचारविनिमय करण्यासाठी उच्च न्यायालयाने एक समिती नेमली होती. यानुसार परदेशातील पालकांचे वय 30 ते 55 तसेच एकटे राहणार्‍या व्यक्तींचे वय 45 वर्षांपेक्षा जास्त असावे. दत्तक देण्यात येणार्‍या मुलाची पूर्ण मानसिक व शारीरिक तपासणी इंडियन प्लेसमेंट एजन्सी (रिपा) तर्फे केली जाईल. यासाठी पालकांना अडीच लाख रुपये अनामत रक्कम जमा करावी लागणार आहे. विदेशी पालकांना 3500 अमेरिकन डॉलर रिपाकडे भरावे लागतील. हा अहवाल पूर्ण झाल्यानंतर त्याची अंमलबजावणी करण्याचा निर्णय घेण्यात येईल.

नवी दिल्ली, दि. 30 (वृत्तसंस्था) - कुणाला तरी त्रास देण्यासाठी किंवा कुणावर राग काढण्यासाठी उगाच पोलीस ठाण्यात तक्रार (एफआयआर) दाखल करीत असाल तर सावधान. कारण तक्रार खोटी असल्याचे सिद्ध झाले तर ती तुमच्यावरच उलटेल आणि थोडीथोडकी नव्हे तर दहा वर्षे तुरुंगाची हवा खावी लागेल, असा कायदा लवकरच अस्तित्वात येणार आहे. खोट्या तक्रारींना आळा घालण्यासाठी केंद्र सरकार लवकरच कायद्यात दुरुस्ती करण्याच्या विचारात असून लोकांना खोट्या तक्रारीत फसवण्याच्या प्रकाराला आळा घालण्यासाठी सरकारने हा प्रस्ताव ठेवला आहे. गृहमंत्रालयाने राज्य सरकारांना आणि केंद्रशासित प्रदेशांना प्रत्येक तक्रारीवर एफआयआरप्रमाणेच कारवाई करण्याचे निर्देश दिले आहेत. पोलिसांकडे केलेली कोणतीही तक्रार एफआयआरमध्ये रुपांतरीत करण्याची यामध्ये तरतूद आहे. या प्रस्तावित तरतुदीबद्दल पोलीस खाते तसेच वकील वर्गाकडूनही साशंकता व्यक्त करण्यात येत आहे.