दुर्गापूजा हा केवळ एक धार्मिक विधी नसून…. -राज्यपाल जिष्णु देव वर्मा यांच्या नवरात्रोत्सवाच्या मनःपूर्वक शुभेच्छा

मुंबई : “दुर्गापूजा हा केवळ एक धार्मिक विधी नसून सर्व धर्म, वर्ण आणि समाजातील लोकांना एकत्र आणणारा महाउत्सव आहे. हा उत्सव सामाजिक एकता, आनंद आणि बंधुभावाचा संदेश देतो. मा दुर्गेची कृपा आपल्या सर्वांवर राहो,” अशा शब्दांत महाराष्ट्राचे राज्यपाल जिष्णु देव वर्मा यांनी जनतेला दुर्गापूजा आणि नवरात्रोत्सवाच्या मनःपूर्वक शुभेच्छा दिल्या आहेत.
मुंबईतील जुहू आणि जिओ वर्ल्ड कन्व्हेन्शन सेंटर येथे आयोजित भव्य दुर्गापूजा आणि नवरात्रोत्सवाच्या कार्यक्रमांना राज्यपालांनी विशेष उपस्थिती लावली. या दोन्ही भव्य सांस्कृतिक मंचांवरून त्यांनी युवकांना एक अत्यंत महत्त्वाचा संदेश दिला.

उत्सवाच्या मंडपातून ‘नशामुक्त भारत’चा एल्गार!

या दोन्ही कार्यक्रमांचे सर्वात मोठे वैशिष्ट्य म्हणजे राज्यपालांच्या उपस्थितीत देण्यात आलेला ‘से नो टू ड्रग्ज’ (Say No To Drugs) चा संदेश! तरुणाईला अमली पदार्थांच्या घातक व्यसनापासून दूर ठेवण्यासाठी राज्यपाल जिष्णु देव वर्मा यांनी विशेष पुढाकार घेतला आहे.
यावेळी बोलताना ते म्हणाले की, “युवकांना व्यसनाधिनतेपासून वाचवण्यासाठी महाविद्यालये आणि विद्यापीठांमध्ये जनजागृती रॅली व विविध कार्यक्रमांना प्रोत्साहन दिले जात आहे. ‘नशामुक्त भारत अभियान’ अंतर्गत आपण सर्वांनी एकत्र येऊन व्यसनमुक्त जीवनाचा संकल्प केला पाहिजे.”

जुहूमध्ये बंगाली संस्कृतीचा गौरव आणि महाआरती

जुहू येथील स्पोर्ट्स ग्राउंडवर ‘बंगाल कल्चरल असोसिएशन’च्या वतीने आयोजित दुर्गापूजा समारोहाला राज्यपालांनी भेट दिली. यावेळी ते स्वतः दुर्गापूजेच्या विधींमध्ये आणि महाआरतीमध्ये अत्यंत उत्साहाने सहभागी झाले. बंगाली भाषेचे महत्त्व सांगताना त्यांनी हिंदी आणि बंगाली भाषिक सलोख्याचे कौतुक केले. “दुर्गापूजेचा उत्सव संपताच बंगाली समाज पुढच्या वर्षाच्या तयारीला लागतो, ही या उत्सवाशी जोडलेली सुंदर सांस्कृतिक परंपरा आहे,” असेही राज्यपाल म्हणाले. याप्रसंगी असोसिएशनचे संस्थापक व अध्यक्ष कृष्णेंदू सेन उपस्थित होते.

फाल्गुनी पाठक यांच्या गरब्यात राज्यपालांची हजेरी

यानंतर, राज्यपाल जिष्णु देव वर्मा यांनी बीकेसी (BKC) येथील जिओ वर्ल्ड कन्व्हेन्शन सेंटरच्या जॅस्मिन हॉलमध्ये आयोजित प्रसिद्ध गायिका फाल्गुनी पाठक यांच्या ‘नवरात्रोत्सव २०२६’ या कार्यक्रमालाही भेट दिली. तिथे त्यांनी देवीची विधिवत पूजा करून आरती केली. गरब्याच्या पारंपरिक आणि उत्साहपूर्ण वातावरणातही त्यांनी उपस्थित हजारो तरुणांना व्यसनमुक्तीची शपथ घेण्याचे आवाहन केले. या कार्यक्रमाला माजी खासदार मनोज कोटक, स्वतः गायिका फाल्गुनी पाठक आणि आसिफ भामला उपस्थित होते. एकंदरीत, महाराष्ट्राच्या राज्यपालांच्या या भेटीमुळे मुंबईतील नवरात्रोत्सवाला एक वेगळाच वैभवी रंग चढला असून, त्यांनी दिलेल्या ‘नशामुक्त भारत’च्या संदेशाचे सर्व स्तरांतून कौतुक होत आहे.